Winnaar MLLF 2011

11 december 2011

Winnaar MLLF 2011 in Neel: Spik en Span oet Zöstere

In eine gezellig gevulde zaal de Ster in Neel is Spik en Span mit 't nummer Leefde Alaaf es winnaar MLLF oetgerope. Naer en Rooj ware respektievelik nr 2 3n nr 3. 14 deilnaemers oet midde Limburg höbbe veur ein fantastiese aovend gezorgd. Neel beefde oppe päöl womit t aan de grondj bevestigt zit. De echte grote winnaar van deze aovend waas absoluut 't publiek. De Katers en in 't biezunjer de werkgroep is zeer tevreje mit 't verloup van de aovend. Vanaf 't begin waas d'r eine sfeer om "je" taege te zegke en degene dae zich neet haet geamuseerd waas det dan ouch zellef sjuld. "t nivo van de leedjes waas erg hoog en de oetsjtraoling van de artieste oppe bühn waas om van te genete. Al biej al eine topaovend.

Tussedoor haet Big Bennie laote zeen wie groot dr is in de Limburgse vastelaovend. Waat ein fees om zo'ne vastelaovesgek aan de gang te zeen oppe bühn. Gans midde Limburg sjtong oppe kop en dach allein maar länger! Frans Theunisz haet de aovend moge sjloete't MLL:F veurdet de winnaar bekind waerde gemaak. Ouch de winnaar van 't MLLF 2010 (Biejeingeraap) en de winnaar van de Neelder leedjesaovend 2011 (Thei van Cruchten) höbbe laote zeen det Neel ein echt vastealovesdörp is opm trots op te zeen.

De organisasie winst Spik en Span perfiesiejat en oeteraard Zöstere väöl suukses mit de organisasie kommend jaor.

Binnekort zulle de fotos oppe sait waere gezat en es geer wilt reagere op deze aovend kint geer det t beste doon op 't gastebook van www.dekaters.nl, 

t is zo ver

07 december 2011

'T Aaftelle is begonne!

Beste Miense, 't aaftelle is begonne. Zaoterdaag 10 December om 19.00 oer gaon de deuren van zaal de Ster in Neel aope en zeet geer welkom. Helemaol veur nop kint geer eine geweldige aovend komme bezeuke. 14 versjillende Midde Limburgse artieste höbbe zich aangemeld mit als doel deze aovend onvergaetelik te make. En es -se daonaeve ouch nog ins mit de pries nao hoes gaon, dan is det sjoon mitgenaome.

Os programma is als volg:

19:00 Aöpene van de zaal en meziek van DJ Tim

19:45 Aöpening van de aovend en de volgorde bepaling (laoting)

20:00 Winnaar MLLF 2011 Biejeingeraap oet Neel

20:10 Leedje 1-7

21:30 Big Bennie

22:30 Sjlager Neel 2011 Thei van Cruchten

22:35 Leedje 8-14

23:45 Frans Theunisz

0:30 Priesoetreiking mit medewerking van de Lindeboom

02:00 zaalsjloeting

De presentasie is in henj van Eric Obstals (vors) en Thei Hawinkels (aad vors), dus det zit waal good.

De jas kint geer ophange in os garderobe veur ein biedrage die waerd besjteed aan de jeugvastelaovend in Neel. Verder is d'r naeve de drank ouch get te aete veur degene die eine knorrende maag kriege. Rouke is neet toegesjtaon, maar moog waal in de verwermde roukerstent. Verder vraoge veer Uch de auto's te parkere oppe parkeerplaats hoeksjtraot, Dr Molsplein of biej de Plus oppe Baekwaeg. Veer zeen d'r nao oet Uche gasheer te moge zeen!

Kiek ouch op vriedaagmiddaag om 16:00 oer nao TVL. Hiej kint geer 't letste nuujts heure van os evenement. De waek nao 't evenment kint geer kieke nao ein sfeerrapportage van deze aovend biej Tromptter TV. Ouch dit is te zeen biej TVL (de vastelaoveszender van Limburg). Missjien zeet geer Uchzellef waal truuk!

Toet zaoterdaag, Mis 't neet! 19:00 oer sjtipt!

Aanmeldingen

06 december 2011

MLLF telt 14 deelnemers

Os Artiesten!:

1. CV de Kwekkerte (Lin) - 'n Pan aaf - 1 2 3 - Après ski
2. KV de Graasburgers (Zöstere) - Spik en Span - Leefde alaaf!
3. VV de Zaotmaale (Rooj) - Men in pek - Blauw plekke
4. CV de Moerebuuk (El) - Bram en Rick - Spektakel
5. Vorsten de Jokers (Bieëgde) - Huugenties - Hiej brandtj de lamp
6. VV de Gangmaekers (Hael) - Haelder Aod Prinse - de Windjvogel
7. CV de Kujeldreijers (Kelpen-Oler) - Sjing Boem - Lekker plat
8. VV de Kwakkert (Heitse) - Die drie - Wiej haetj det dink? De klink
9. VV de Kwiebusse (Naer) - Óm in te lieste - Ós hoeëgtepuntj
10. VV de Vreigeleers (Haelen) - Hoondervel - Dae Sjieke
11. CV de Borchgrave (Roostere) - De neet Soprane - Ooze sambabend
12. VV de Bokkeriejers (Tungelder) - Zus en Klus - Laeve de hoempapa
13. VV de Hopsjlokkers (Zjwame) - De Razelaers - Waat duit dit good
14. VV de Katers (Neel) - Wil, Frank en Frank - Ich zegk 't dich

De organisasie winst alle deilnaemers ein fantasties optraeje!

Waord van de veurzitter

21 september 2011

 Leef luuj,  

Op ’t inj van ’t veurig jaor haet v.v. de Katers mitgedaon aan ’t Midde-Limburgs-Leedjes-Festival (kórtgezag MLLF) en ouch nog gewónne. De Katersjlager van ’t jaor daoveur haet dao de eerste pries in de wach gesjleip. ’t Leedje “de heel nach door” is gesjreve door Jan Huijskens (teks) en Tof Deckers (meziek) en gezónge door “Biejeingeraap”. Dit gruupke besjteit oet Raoul en Angelique van Cruchten, Els Habets, Peter Naus en Wiel Moonen.

Biej ’t MLLF is ’t zo det de winnaar ’t jaor d’r nao ’t MLLF moog organisere. Dao zeen veer bliej mit. Weer get te doon in ’t dörp. Veur de fekansie is t’r ein kemmisie samegesjtèld die dit festival op peut gaon zètte.

 ‘t Zal plaatsvinje in ’t Katerpelies, de Sjter en waal op 10 desember. Zo-es oet de naam MLLF bliek, kinne hiej allein vastelaovesvereniginge oet Midde-Limburg aan mitdoon. Det wilt zègke, van Weert toet Remunj en van Söstere toet Zjwame. Dees vereniginge kinne den de sjlager van ’t veurig jaor of dit jaor insjture. Aan dit festival, mit ein regionale oetsjtraoling, doon tösse de viefteen en twintjig deilnummers mit. Det beteikent ein aovendvullend program mit eige vastelaovesmeziek. Ein LVK veur Midde-Limburg. 

Biej ’t organisere van zo’n leedjesfestival kump ’t neudige kieke en de kemmissie haolt alles oet de kas om d’r ein geweldig fees van te make. Waat ós al twee keer gelök is mit ’t LVK zal ós noe zeker lökke mit ’t MLLF. 

Ich bön d’r van euvertuug det de kemmissie, besjtaonde oet Ronald I, Erik IV, Raoul I, Clemens I en Hans Metten (orde van verdeenste) d’r get sjoons van geit make. Geer waert op de heugte gehaje vieja oze website en angere medieja. Toet 10 desember in de Sjter. 

 L. Hamans (veurzitter v.v. de Katers Neel)

Welkom

12 september 2011

Welkom op de nuje MLLF website

Zowie geer missjien vernaome hubt, haet "Biejeingeraap" oet Neel in 2010 het MLLF gewonne. Door dit heuglikke feit moog v.v. de Katers dit jaor het MLLF organisere. Dit fees zal plaats gaon vinje op 10 December biej Café Zaal de Ster in Neel (Maasniel).

De werkgroep is al ein tiedje bezig mit de organisasie en in ein sjtrak tempo waere de fundamente gelag veur eine sjone aovend. Veer haope Uch te moge verwelkomme op deze aovend.

Mit grote trots presentere veer Uch dees Website, die mit ongersjteuning van Arc/Nettt toet sjtandj is gekomme. Veer haope det geer de site kint waardere en det geer oppe tied kiek nao de ontwikkelinge in de aanloup nao 't MLLF 2011. Hub geer boete alle informatie die geer hiej kint vinje toch nog vraoge, huiver dan neet om os via CONTACT te benadere.

Veer hubbe d'r zin in, Haopelik toet in Neel!

Werkgroep MLLF 2011 (Ronald, Raoul, Erik, Cleem en Hans)